U dwar il-prodotti importati?
Il-leġiżlazzjoni tal-UE timmira lejn użu aktar sigur tas-sustanzi kimiċi anke fil-prodotti li tixtri fis-suq tal-UE. Hemm sistemi fis-seħħ biex jiżguraw is-sigurtà tal-prodotti, kif ukoll biex jiġu intraċċati u rtirati dawk mhux siguri.
Il-leġiżlazzjoni tal-UE għandha standards ta' sigurtà għoljin. Id-Direttiva dwar is-Sigurtà Ġenerali tal-Prodotti għandha l-għan li tiżgura li fl-UE jinbiegħu biss prodotti siguri. Il-kumpaniji jenħtieġ li jimportaw u jbigħu biss prodotti li huma siguri u dawn jenħtieġ li jinfurmaw lill-konsumaturi dwar kwalunkwe riskju tal-prodotti tagħhom. Dawn għandhom jiżguraw ukoll li l-prodotti perikolużi jkunu jistgħu jiġu intraċċati sabiex ikunu jistgħu jitneħħew biex jiġu evitati riskji għall-konsumaturi. Għalhekk, jekk tixtri prodotti li mhumiex manifatturati fl-UE iżda importati minn x'imkien ieħor, dawn xorta jridu jikkonformaw mal-istess standards ta' sigurtà kimika. Huwa l-importatur tal-prodotti fl-UE li huwa responsabbli minn dan.
Skont ir-regolament REACH, il-kumpaniji li jimportaw prodotti fl-Ewropa jeħtieġ li jkunu jafu jekk il-prodotti tagħhom fihomx sustanzi ta’ tħassib serju ħafna li jaqbeż ċertu livell, u huma meħtieġa li jgħaddu din l-informazzjoni lill-bejjiegħa bl-imnut u lill-konsumaturi meta dawn jitolbuha. L-importaturi jeħtieġ li jkunu jafu wkoll jekk il-prodotti tagħhom fihomx sustanzi kimiċi li ġew ristretti fl-Ewropa - bħal pereżempju, ċomb fil-ġojjellerija.
L-awtoritajiet jistgħu jużaw ir-restrizzjonijiet skont REACH sabiex jindirizzaw prodotti mhux siguri. Dawn jistgħu, pereżempju, jillimitaw jew jipprojbixxu l-użu ta’ sustanza kimika - jew waħedha jew fi prodotti speċifiċi.
L-identifikazzjoni u t-tneħħija ta’ prodotti mhux siguri mis-suq tal-UE
Jekk il-monitoraġġ jindika li prodott fis-suq jista’ jkun mhux sigur, hemm sistemi fis-seħħ sabiex jindirizzaw il-kwistjoni u jiżguraw it-tneħħija tiegħu.
Hija primarjament ir-responsabbiltà tal-awtoritajiet nazzjonali fl-Istati Membri li jivverifikaw jekk il-prodotti fis-suq humiex siguri u japplikaw sanzjonijiet fejn meħtieġ. Dawn jikkooperaw mill-qrib mad-dwana sabiex jipproteġu lill-konsumaturi minn prodotti importati mhux siguri li jiġu minn barra l-UE.
Sabiex tappoġġja dan il-proċess, il-Kummissjoni Ewropea qiegħda tħaddem sistema ta’ sigurtà msejħa Sistema ta’ Twissija Rapida, li tippermetti l-iskambju ta’ malajr ta’ informazzjoni bejn il-pajjiżi fl-UE dwar prodotti mhux tal-ikel perikolużi li joħolqu riskju għas-saħħa u s-sigurtà tal-konsumaturi.
Meta l-awtoritajiet fi Stat Membru jidentifikaw prodott perikoluż, il-prodott jista’ jiġi rtirat u l-awtorità ser tinforma lill-Kummissjoni Ewropea. Il-Kummissjoni mbagħad ser tinforma lill-bqija tal-UE u ser tippubblika twissija għall-konsumaturi jekk il-prodott diġà jkun fis-suq. Jekk jiġi identifikat prodott fil-fruntiera, l-importazzjoni ser titwaqqaf. Jekk il-prodott jiġi importat minn barra l-UE, pereżempju miċ-Ċina, l-awtoritajiet Ċiniżi ser jiġu infurmati.
L-ECHA tippubblika xi ftit minn dawn il-prodotti fuq il-kanali tal-midja soċjali tagħna. Jekk tixtieq tara r-rapport sħiħ mis-sistema Rapid Alert, segwi l-link ta’ hawn taħt.
Aqra aktar
- Market surveillance – list of national authorities - Il-Kummissjoni Ewropea
- Rapid Alert System for dangerous non-food products - Il-Kummissjoni Ewropea
- European consumer centres - Il-Kummissjoni Ewropea
- Specific products, standards and risks - Il-Kummissjoni Ewropea
Aqra aktar
-
Kif jiġu kkontrollati s-sustanzi kimiċi?
Il-ħajja ma tkunx teżisti mingħajr sustanzi kimiċi - dawn huma preżenti fina, madwarna, u f’kull prodott li nixtru. L-Unjoni Ewropea għandha l-aktar liġijiet ambizzjużi dwar is-sustanzi kimiċi fid-dinja biex jipproteġuna. Kemm il-kumpaniji kif ukoll l-awtoritajiet għandhom rwol x’jaqdu fit-titjib tas-sigurtà.
consumer_read-more -
L-industrija se tirreġistra s-sustanzi kimiċi
Fis-suq insibu eluf ta’ sustanzi kimiċi differenti. Dawk użati fl-Ewropa u li jiżnu ’l fuq minn tunnellata jridu jiġu rreġistrati sabiex inkunu nistgħu nsiru nafu aktar dwar l-impatt potenzjali tagħhom fuq saħħitna u l-ambjent.
consumer_read-more