In-nanomaterjali fuq il-post tax-xogħol
Illum il-ġurnata, in-nanomaterjali kważi jinstabu kullimkien, iżda xi ħaddiema huma aktar esposti għalihom minn oħrajn. Jekk qiegħed/qiegħda taħdem b’partikoli żgħar b’mod jew ieħor, jaf għandek bżonn taqra dan.
Ħafna drabi xi ħaddiema jiġu esposti għan-nanomaterjali b’mod differenti u aktar dirett mill-konsumaturi anki jekk illum il-ġurnata tista’ ssib in-nanomaterjali f’ħafna prodotti.
In-nano fidda jnaqqas il-batterja u għalhekk jintuża fil-ħwejjeġ, fil-magni tal-ħasil tal-platti, fil-friġġis u fit-tagħmir tal-isptar, bħala ftit eżempji. Nanomaterjali oħrajn jintużaw fl-ikel, fl-elettronika, fil-kożmetiċi u f’ħafna aktar prodotti ta’ kuljum.
Meta jinġibdu man-nifs, xi nanomaterjali jistgħu jikkawżaw pulmun infjammat u jekk dawn jidħlu fil-fluss tad-demm, jistgħu wkoll jilħqu organi oħra bħall-fwied, il-kliewi u l-milsa fejn jistgħu jikkawżaw effett tossiku.
Bħal kwalunwe sustanza kimika oħra, ir-riskju tan-nanomaterjali jrid jiġi vvalutat każ b’każ, iżda xorta għad hemm bżonn ta’ aktar data qabel inkunu nistgħu nivvalutaw kif xieraq is-sigurtà tagħhom. L-ECHA u awtoritajiet oħra qed jaħdmu biex jiċċaraw kif il-leġiżlazzjoni dwar is-sustanzi kimiċi għandha tiġi applikata għan-nanomaterjali sabiex inkunu nistgħu niżguraw l-użu sigur tagħhom.
Min jaħdem bin-nanomaterjali?
Int tista’ tiġi f’kuntatt man-nanopartikoli fi kwalunkwe post tax-xogħol fejn dawn jiġu prodotti jew immaniġġjati. Hemm xi ftit hotsposts, pereżempju, jekk int:
- taħdem f’żona tal-ippakkjar fejn jiġu mmanifatturati n-nanopartikoli
- tnaddaf jew iżżomm tagħmir bħal filtri
- taħdem bi proċessi tal-weldjar
- tiżbogħ jew tixkatla wċuħ
- tiġbor, tittrasporta jew tarmi l-iskart
Kif niġi f’kuntatt man-nanomaterjali?
In-nanomaterjali jistgħu jidħlu f’ġismek bi tliet modi differenti: int tista’ tiġbidhom man-nifs, tikolhom jew tixrobhom, jew dawn jistgħu jiġu assorbiti mill-ġilda.
Pereżempju, ħafna pigmenti fiż-żebgħa huma fil-fatt nanomaterjali. Meta tuża żebgħa tal-isprej tista’ tiġbidhom man-nifs jekk ma tintużax protezzjoni. Għalhekk huwa importanti li taqra t-tikketti sabiex tiżgura li l-prodott jiġi mmaniġġjat b’mod sigur.
Jista’ jsir kuntatt mal-ġilda meta timmaniġġja trab jew likwidu bħal żebgħa jew meta tkun f’atmosfera ta’ trab bin-nanopartikoli.
In-nanopartikoli mhumiex mistennija li jidħlu fil-ġisem minn ġilda b’saħħitha, iżda dejjem huwa rakkomandat li timminimizza l-kuntatt mal-ġilda u li ssegwi prattika ta’ iġjene okkupazzjonali.
Li tibla’ n-nanopartikoli aktarx li tiġri biss jekk ma ssegwix ir-regoli dwar is-sigurtà, pereżempju, jekk ma taħsilx idejk jew jekk tilbes ilbies protettiv barra miż-żona tax-xogħol wara li tkun ħdimt bin-nanomaterjali.
Fejn nieħu parir?
Jekk m’intix ċert/a jekk il-materjali li qed taħdem bihom fihomx nanopartikoli, jenħtieġ li tkun tista’ ssib din l-informazzjoni billi taqra t-tikketti u l-pittogrammi li juru perikli potenzjali. Għandu jkun hemm ukoll skeda ta’ data ta’ sigurtà dwar ir-riskji, tagħmir ta’ protezzjoni personali u pariri dwar x’tagħmel f’każ ta’ esponiment aċċidentali. Jekk xorta għadek m’intix ċert/a, jenħtieġ li tistaqsi lis-superjur tiegħek jew lill-konsulent dwar is-sigurtà fuq il-post tax-xogħol tiegħek.
Previous Next Layout
Aqra aktar
-
X’inhuma n-nanomaterjali?
In-nanomaterjali huma tassew żgħar. Fil-fatt huma żgħar ħafna, ħafna. Madankollu dawn jista’ jkollhom impatt kbir fuq il-ħajja tiegħek ta’ kuljum li jagħmilhom eċċitanti u importanti li ssir taf dwarhom.
consumer_read-more -
In-nanomaterjali u s-saħħa
Is-sustanzi f’nanoformi huma aktar perikolużi milli huma fid-daqs normali tagħhom? Xi wħud huma u xi wħud le. Bħal kwalunkwe sustanza kimika oħra, in-nanomaterjali jridu jiġu vvalutati separatament.
consumer_read-more